निरंजन म्हणजे कोणालाही भुरळ घालेल असा हुशार, बुध्दिवादी, देशभक्त आणि विचारवंत लेखक. मग मंदाकिनीसारखी हुशार आणि सुंदर युवती त्याच्या प्रेमात पडली नसती तरच नवल होतं...! पण निरंजनचं विवाहित असणं ही दोघांच्याही प्रेमाच्या पूर्तीमध्ये एक फार मोठी लक्ष्मणरेषा होती. ही लक्ष्मणरेषा ओळखूनच दोघांनीही आपले प्रेम संयमितच ठेवले व त्यातले पावित्र्य कधीही भंगू दिले नाही.
मात्र निरंजनची पत्नी जान्हवी व मंदाकिनीवर एकतर्फी प्रेम करणारा श्री यांना त्या दोघांच्या मनाचा मोठेपणा कधी दिसलाच नाही. केवळ मत्सर आणि गैरसमजामुळे दूषित झालेल्या आपल्या बुध्दीमुळे त्यांनी निरंजन व मंदाकिनीला तर त्रास दिलाच, मात्र स्वतःचेही भरपूर नुकसान करून घेतले.
एकीकडे आई - वडिलांची 'श्री' बरोबर लग्न करण्याविषयीची इच्छा व दुसरीकडे निरंजनवरचे गाढ प्रेम या द्वंद्वात अडकलेल्या मंदाकिनीला काही ना काहीतरी ठाम निर्णय घेणे भागच होते. निरंजनपासून लांब जाऊन 'श्री' बरोबर लग्न करण्याचा निर्णय ती घेऊ शकली का ?श्री व जान्हवीला शेवटपर्यंत आपली चूक कळाली की नाही ?... निरंजनने या सर्व गोष्टी कशा प्रकारे
हाताळल्या ?...