जागतिकीकरणाच्या या वातावरणात संपूर्ण जगच इतकं जवळ आलं आहे की, देश, प्रांत यांच्यामधील सीमारेषा जणू काही पुसल्याच गेल्या आहेत. वेगवेगळे देश, तिथली संस्कृती, रीतीरिवाज याविषयी जाणून घेण्याची माणसाची उत्सुकताही तितकीच वाढते आहे. अशा वेळी देश-विदेशातील प्रसिध्द साहित्य आपल्या भाषेत उपलब्ध होणे हेही तितकेच महत्त्वाचे बनले आहे. मुळातच दिवसेंदिवस विविध भाषांमधील प्रसिध्द अनुवादित साहित्य वाचण्याकडे मराठी वाचकांचा कल वाढतो आहे.

विविध भाषांमधील अनुवादित पुस्तके प्रकाशित करण्याच्या या मालिकेमध्ये आम्ही रूसी भाषेतील कथांचा समावेश केला आणि बरीच मुलूखगिरी करून, तज्ज्ञांचा सल्ला घेऊन त्यातील अत्युकृष्ट अशा कथांची निवड केली. अत्यंत समृध्द अशा रूस वाङ्मयातून मोजक्याच कथा निवडणे खरं तर अतिशय कठीण गोष्ट होती, परंतु तरीही अगदी बारकाईने विचार करून आणि महाराष्ट्रीय विचारसरणीला आपल्याशा वाटतील अशा अत्युत्तम कथांची निवड करून त्या मराठी वाचकांना उपलब्ध करून देत आहोत.

या कथांमधून रूस लेखकांच्या अप्रतिम लेखनप्रतिभेचे दर्शन तर घडतेच, शिवाय रूस समाजातील रीतीरिवाज, संस्कृती, चालीरीती, तेथील लोकांची विचारसरणी याविषयीही रंजक माहिती मिळते. अत्यंत विचारपूर्वक निवडलेल्या या कथा खचितच वाचकांच्या पसंतीस उतरतील.